شاكر السماوي /////
حاله غير عابرة
شاكر السماوي
ياما احلِمتني اذنوب تزحفني بين اذنوب،
اِتلملِمَت بعضها بيَّ اعلىَ بعض، او عليْ
حامت ظنون الخوف ….
بين العِمىَ والشوف.
واهجَسِت باب الضوه تنفك، او تنسَد باب …
ظلمه اعلىَ حدها الموت
بس يحسِب الغيّاب
جِفلَت اذنوبي، اوشِفت
روحي ابصَداي اتفوت
تِحــديني خَرسة، اوشِفت
وحدي آنه بيد الرب،
مُذنِب اوفاته الحين
البيه يكدر ايتوب!
…………………….
ابذيج اللحظه …
اهجَست اللحظات الجانتني، والصَّارتني
راحت تِمتد بيَّ، او بيها
هَمْ رِحت امتد.
اوصِرت اتلفَّت بيَّ، اوراحت
كل افعالي تِتلفَّت بيَّ، او تتنشَّد :
عن اسراري
او عن اعذاري
او عن غاياتي المَخفيّات ابظَلمة روحي
واللي ظلت دوم اتوارِبني اشماكِعها اببعض الصَّد.
او عن نياتي ابتالي الذات،
الأستِر بيها بهضي، او هيَّ…
تِسترني من بعض اعيوبي الماتِنرَد.
………………
اومن شاف الرَّب
بعضي اتبرىَ من بعضي ومني،
وآنه اتبريت امن الباقي،
اتحَّير ميزانه ابأوزانه، اوضاعت اسبابة اباسبابي.
اوحتىَ احكامه، تاهَت بين الرَّاده اورِدته!
اوزادت حيراته ابحالاتي الماتِترتَّب :
اشيغفرلي اوجدامه اسنيني
قوس امقزَّج بالأفعال
اللي تنحَب او ما تنحَب؟
………………….
وآساني الرَّب اوواعدني يمسح كل هفواتي اوياه،
او يغفُر كل غلطاتي ابحقَّه، بس ابشرط …
ابشرط احجي له عن اخيالي:
•- اشلون؟
او ليش؟
او بيش؟ …..
وَسوَس لي او خلّاني امتَد
وياه او خلاني ارتَد
بيَّ، اوبيه اردود امتد،
واتدولَب من حَد الحَد ….
بيهن أبعِدني او أشتَط!
…………………….
اتلَملَمت ابآخر افكاري،
او جاوبته او مازاغ الخط:
_ بيني اوبينك يارب، واعْلَم ….
/ اوما من شك الاِنتَ الأعلم./
بكل اسنيني الظليّت آنه اتدولَب بيها،
بين الشك اليطفي الشك،
والشك اللي يضوي الشك،
اتصَّفر عقلي، وتحيَّد، وآنه اتصفَّرت،
بينك يارب، اوبين اخيالي،
اللي ودّاني الحَدَّك وارتد ….
ينشِدني : البحر ابياشَط ؟؟؟؟
يوتوبوري
2005-03-03
التعليقات مغلقة، ولكن تركبكس وبينغبكس مفتوحة.