صبحي البيجواني /////
لا تزعل عليّ
اذا تزعل عليّ و تصد يمحبوب
اشظل من العمر بالزعل نگضيه
أخاف على الورد من يعطش يذوب
إذا ما بالوصل و الشوگ نسگيه
على رياض المحبه نخضر الدروب
و سولفلك دليلي شبيه ما بيه
نشيل ذنوب لو نترك هالگلوب
بعيده و كل گلب يتنه اليوافيه
يكلفها الظما حسرات و ندوب
و تفيض بشوگ غرگانه سواجيه
حبيبي ابقى اشتكيلك دوم چم دوب
و ارضيك و دليلي شوكت ترضيه
يبستان الورد يالفايح طيوب
أخليك بنظر عيني و بيابيه
و ابقالك نذر عالطول مطلوب
بديك شوكت ما تأمر تأديه
هم تريده عمر العلي محسوب
إذا ما صحلي اشوفك يا حلو بيه
أنا بمأتم بنص الگلب منصوب
إذا ما شوفتك يهواي تجليه
تعال آني اعتذر ما ازعلك انوب
و لا احقق لكل شامت أمانيه
تعال امطر فرح يا خالي العيوب
بسمتك تسگي ظامي جواي ترويه
تعال اطفي الشرار البيا مشبوب
يشگة فجر من طلت شمس بيه
يبو شفاف الندى و سنون حالوب
و بمراية خدودك عگلي ديتيه
اليمته يظل دليلي يخاف مرعوب
تروح و ما ترد تمشي و تخليه
عن ملف النور للادب الشعبي العدد الثالث
التعليقات مغلقة، ولكن تركبكس وبينغبكس مفتوحة.